ماہنامہ عبقری - جون 2011ء

Meditation یعنی مراقبہ جہاں ازل سے روحانیت کی ترقی اور مشکلات کے حل کا علاج رہا ہے وہاں جدید سائنس نے اسے امراض کا یقینی علاج بھی قرار دیا ہے۔ ہزاروں تجربات کے بعد عبقری کے قارئین کے لئے مراقبے سے علاج پیش خدمت ہے۔ سوتے وقت اگر با وضو اور پاک سوئیں تو سب سے بہتر ورنہ کسی بھی حالت میں صرف 10 منٹ بستر پر بیٹھ کر بلا تعداداَللّٰھُمَّ رَبَّنَا مَالِکَنَا کا ورد اول و آخر 3 بار درود شریف پڑھیں پھر لیٹ جائیں۔ جس مرض کا خاتمہ یا الجھن کا حل چاہتے ہوں اس کو ذہن میں رکھ کر یہ تصور کریں کہ ” آسمان سے سنہرے رنگ کی روشنی میرے سر سے سارے جسم میں داخل ہو کر اس مرض کو ختم یا الجھن کو حل کر رہی ہے اور اس وظیفے کی برکت سے میں سو فیصداس پریشانی سے نکل گیا/گئی ہوں“ یہاں تک کہ اس تصور کو دہراتے دہراتے نیند آ جائے۔ شروع میں تصور بناتے ہوئے آپکو مشکل ہو گی لیکن بعد میں آپ پر جب اسکے کمالات کھلیں گے تو حیرت کا انوکھا جہان اور مشکلات کا سو فیصد حل خود آپ کو حیرت زدہ کر دےگا۔ مراقبے کے بعد اپنی کیفیات فوائد اور انوکھے تجربات ہمیں لکھنا نہ بھولیں۔ مراقبے سے فیض پانے والے محترم حکیم صاحب السلام علیکم! میری عبقری سے ملاقات 3 سال قبل ہوئی۔ شروع دن سے ہی یہ رسالہ بہت زبردست ہے۔حکیم صاحب مجھے چکر ‘ متلی‘ سانس بند ہونا کی بیماریاں تھیں۔ میں نے بہت سے ڈاکٹروں اور حکیموں سے علاج کروائے لیکن وقتی طور پر فائدہ ہوتا تھا بعد میں پھر وہی حالت ہوجاتی تھی۔ میں نے پھر ایک دفعہ عبقری رسالے میں مراقبے کا عمل دیکھا اور پورے یقین کے ساتھ مسلسل کچھ عرصہ کیا۔ حکیم صاحب اللہ کا شکر ہے کہ چکر‘ متلی‘ سانس بند ہونے کی بیماری تو جیسے تھی ہی نہیں۔ اللہ کا شکر ہے کہ اب میں بالکل ٹھیک ہوں۔ حکیم صاحب مراقبے کا عمل کرنے سے میری بے شمار روحانی بیماریاں بھی ٹھیک ہوگئیں ہیں۔ اب میں خشوع وخضوع کے ساتھ نماز پڑھتی ہوں اور ہر وقت زبان پر ذکر جاری رہتا ہے۔حالانکہ مراقبے کا عمل کرنے سے پہلے میں ایسی نہ تھی۔ (مزمل شفیق‘ لاہور) پچھلا صفحہ